Illoqarfiup qeqqa

Illoqarfiup qeqqata ineriartortinneqarnissaanut kommunip pilersaarusiorfigineqarneratigut periarfissaavoq. Taamaalilluni Pisiffimmit Brugsenip tungaanut pisiniarfiit immikkullu ittunik tuniniaallutik pisiniarfiit amerlanerusut ammarneqarsinnaalissapput, illoqarfiullu qeqqa ersarinnerulissalluni. Pisiniarfinnut ataasiakkaanut sapinngisamik biilinut inissiiviliortoqartassaaq.

Aqqusinersuaq-mi aqquserngit sinai illugiisillugit pisuinnarnut aqquserneqassapput. GTO-plads-imi Iliveqarfiullu eqqaani uninngaartarfissanik sammisassaqartitsivissanillu marlunnik pilersitsisoqassasoq siunnersuutigineqarpoq. Taamaaliornikkut illoqarfimmiut takornarissallu illoqarfiup qeqqani arlaatigut sammisaqarnissaminnut periarfissaqalissapput.

Najugaqarfissiani ulluinnarni atortussanik niuertarfiit ikilisillugit, illoqarfiup qeqqani ulluinnarni atortussanik niuertarfiit amerlisarlugit aaqqissuussisoqarnissaa sulissutigineqarpoq.

Peqqissaaviit aaqqissuussiffigeqqinneqarnerisut nunap immikkoortortaani Peqqissaavittut toqqagaalluni Peqqissaavik aamma illoqarfiup qeqqaniippoq. Nunap immikkoortortaani Peqqissaavittut toqqarneqarneratigut alliliisoqartariaqalissappat, avannamut kangimullu allilerneqarsinnaassaaq.

Alliliinissaq pisariaqalissagaluarpat, nunap immikkoortortaani Politeqarfiup eqqartuussiveqarfiullu allaffeqarfii allilerneqarsinnaassapput, illoqarfiullu qiterpasissortaani, assersuutigalugu quleriinnik nutaanik sanaartornerni sanaartukkat naqqini pisiniarfiliinikkut qaliaannilu allaffeqarfiliinikkut, innuttaasunut kiffartuussiviit assigiinngitsut taakkununnga inissinneqarsinnaapput.

Inuusuttunut ilinniarfiit, ilinniarfiillu ingerlariaqqiffiusut ataatsimoortinneqarnissaa pigiinnarumallugu, Sanaartornermik Ilinniarfiup Aatsitassanullu Ilinniarfiup eqqaani nunataq annertusineqassaaq. Nunap immikkoortortaani tassani aamma ilinniartut inissaat pilersaarusiorfigineqassapput.

Inuutissarsiorfinni B5-imi B6-imilu nutaaliorsinnaanissaq periarfissanngortinneqassaaq, taamaattumillu immikkoortortani taakkunani suliffeqarfiit siunissami Kangerluarsunnguami inuutissarsiorfissamut B8-mut nuutsinneqassallutik.

Taamani inuutissarsiorfiit B5 aamma B6 pilersinneqarmata, sammisassanut atatillugu akornutaanatik illoqarfiup avammut killinganiipput. Maannakkut illoqarfimmi nutaanik najugaqarfissiaqarneratigut, inuutissarsiorfiillu ataatsimoornerisigut ilaatigooriarluni inuutissarsiorfinni ingerlanneqartut avatangiisinut akornutaasinnaasarput. Taamaalilluni suliffeqarfiit ingerlataat pitsaanngitsumik killilerneqartarlutik.