Illoqarfimmi pioreersumi najugarisanik annertusaaneq eqikkartiternermik ingerlanneqassaaq. Qatsissumi inissiat nutaanngitsunik illoqarfiup nutarternerata ingerlatiinnarnissaa pingaaruteqarpoq. Qatsissumi inissianik arfineq-marluk angullugit quleriinnik nutaanik sanaartornissamut periarfissanik ilaartorneqarpoq, inissiallu pioreersunik nutarterineqassalluni.
Ungussiviup allilerneqarnera ingerlaannassaaq, tassani ilaqutariinnut ataasiakkaanut illunik, illunillu sanileeriaannik pilersitsineqassalluni.
Heliport-ikup nalaani ilaqutariit arlalikkaanut najugaqarfinnik marlunnik – sisamanik quleriiaanik sanaartortoqassasoq, Illuliassanik titartaasartut 70 N-imit siunnersuutigineqarpoq. Akunnittarfimmik nutaamik orniginartumik aammalu imaanut isikkivilimmik pilersitsisoqarsinnaavoq. Immap tungaanut qaqqap naqqani sanaartornissamut periarfissat aamma suliarineqarput.
Savinnut isuani ujaqqerivimmi najugaqarfissanik nutaanik sanaartornissamut ilanngussisoqarpoq. Illut tassani sanaartorneqartut arfineq-marlunnik quliilerlugit sanaartorneqarsinnaapput.
Amutsiviup akiatungaani qaqqani, anartarfileriviullu qulaani najugaqarfinnik nutaanik sanaartornissamut periarfissanik ilanngussisoqarpoq. Tassani ataatsimik – marlunnik quleriinnik sanaartukkat, ilaqutariit ataasiakkaanut ammasunik pukkitsunillu sanaartorfiit, inissiat qanittut pukkitsullu, soorlu illut sanileriiaat, illut eqimattat assigisaallu inissinneqassallutik.
Illoqarfiup immikkoortuani nutaami najugaqarfinnik sanaartornissamut periarfissiissaaq. Alumiiniliorfimmut aammalu Iliveqarfitoqqap Qooruanit aqqusinermik pilersitsineq najugaqarfissanik sanaartornissaq aallaaveqassaaq. Nunaminertami tassani sanaartornissamut pingaarutaavoq, qaqqap tungaanut qutsinnerpaamik immamiillu ungasinnerpaamik sanaartortoqassasoq, sanaartukkallu pukkinnerpaat ataatsimik marlunnillu quleriiaat sinerissamut qaninnerpaassasut.
