Attaveqarneq tassaavoq angallannikkut attaveqatatigiinnikkullu inuiaqatigiinnitsinni ataqatigiinnissaanut qassutaasoq. Kalaallit Nunaanni illoqarfiit nunaqarfiillu tamarmik qeqertatuulli pinngortitami annertuumi inissisimapput, taamaallaat timmisartukkut, umiarsuartigut, telep attaveqataataatigut ukiuuneranilu qimussitigut/qamuteralatsigut attaveqaateqarluni, inoqarfiit akornanni sumiluunniit aqqusineqarnertigut pilersitsisoqarnikuunngilaq.
Qeqqata Kommuniani Kangerlussuarmi, Sisimiuni Maniitsumilu mittarfeqarpoq, nunaqarfinnilu tamani pisortat qulimiguulinnut mittarfeerassaanik pilersitsisoqarsinnaaneranut kommunip pilersaarusiorneqarnerani periarfissiisoqarpoq, taamaalilluni ilaatigut takornariaqarnikkut inuutissarsiuteqarnermi assersuutigalugu qulimiguulinniit sisorartitsinermut atatillugu qulimiguulimmik missinnaaneq pitsaanerusumik periarfissillugu.
Qeqqata Kommunianiit isigalugu, Kangerlussuarmi mittarfik aningaasaleeqataalluartuuvoq, tassaSisimiut peqatigalugu takornariaqarnerup ineriartortinnisaanut suli annertuumik tamaani periarfissaqarmata aammalu uuliamik gassimillu suliffissuaqarnerup aatsitassaqarnermullu sullissinnissanik neqeroorutit ineriartortinneqarnissaanut aamma aallaaviummat pingaaruteqartoq. Europap aamma Amerikap avannarliup akornanni akunnittarfittut assartukkanik siammartiterivittut ineriartortinneqarsinnaanera immaqa periarfissaqarpoq.
Kangerlussuaq Kalaallit Nunaanni mittarfinni timmisartumik aqqusaarfigissallugu isumannaannersaavoq, aammalu timmisartumik aqqusaartarneq inuutissarsiornermut annertusaarnerup soorlu takornariaqarnermut, aatsitassarsiornermut aamma uuliamik gassimullu tunngatillugu pingaaruteqartuuvoq pingaaruteqartuassallunilu. Inuutissarsiuutit taakku isumannaatsumik timmisartumik aqqusaartoqartarnissaanik pinngitsuuisinnaangillat, kinguaattoornerit assigisaallu annertuunik akeqartarmata, tunisassiornermilu aamma soorlu ilaasut unnuisussanngortunut inissiigallartarnermut aningaasanik annertuunik annaasaqarfiusarlutik. Ilutigitillugulu imarpik qulaallugu mittarfik qaninnerpaaq akunnerni amerlasuuni ungasissuseqarpoq.
Air Greenland-ip Dash 7-nniata atorunnaasikkiartornerata kingunerissavaa, Maniitsumi Sisimiunilu mittarfiit allineqarnissaanik pisariaqartitsilernissaq, immaqa 1200 meterit missaanut, taamaalillutik timmisartunut allaanerusunut nutaanut miffiusinnaanngorlutik. Mittarfinnik talliliinissamut atatillugu annertunerusumik eqaallisaanissaq tulluartuussaaq, taamaalilluni timmisartunik assigiinnginnerusunik atuisoqarsinnaalluni.
Periarfissat pilersaarutitut siunnesuummi ilanngunneqarnikuupput.
Qeqqata Kommuniani Kangerlussuaq minillugu ukioq kaajaallallugu illoqarfiit nunaqarfiillu tamarmik umiarsuarnik aqqusaarneqartarput. Kangerlussuaq ukiumut marluk pingasoriarluni pajuttumit tikinneqartarpoq, aammalu 2008-mi takornariartaatit ilaasuminnik paarlaatsitsinermut atatillugu 55-eriarlugu tikippaat.
Sisimiut Maniitsorlu ullut arfineq-marlukkaarlugu RAL-ip pilersuinermut angallataanit tikinneqartarput, nunaqarfiillu sinneri sapaatip akunnera allortarlugu tikinneqartarlutik. Maniitsoq, KangaamiutSisimiullu sinersortaammik tikinneqartarput. Nunaqarfiit sinnerini angallatinik inunnik ilaasoqarnissamut akuerisaasunik attartornikkut imaluunniit inuinnaat angallataat atorlugit tikinneqartarput.
Qeqqata Kommuniani aasaanerani umiarsualiviit amerlasuut umiarsuarnik takornariartaatinik tikinneqartarput, amerlasuutigullu Kangerlussuarmi aallartittarlutik tamatumalu kingorna sinerissami nunaqarfiit illoqarfiillu assigiinngiiaartumik tikinneqartarlutik.
Kilisaatit Royal Greenland-imut raajanik assagiarsunnillu tunisiniarlutikSisimiuni umiarsualivik amerlasuutigut tikittarpaat, kisianni Maniitsumi umiarsualivik aamma saarullinnik assagiarsunnillu aallaaveqartumik aalisakkerivinnut annikinnernut atugassiaavoq.
Ullumikkut artornartutigut isikkoqartut ilagivaat, umiarsuartigut sullissinerup ullutsinnut naleqqussarneqassappat,Sisimiuni, Maniitsumi Kangerlussuarmilu umiarsualiveqarnermut siunertalinnut nunaminertanik immikkoortitsisoqarnissaa pisariaqartinneqarmat.
Maniitsumi Aluminiumik aatsiterivimmik pilersitsisoqarneranut atatillugu Maniitsup qeqertaata avannaatungaani umiarsualivimmik nutaamik pilersitsisoqassaaq, nassiussanut assartuinermut atorneqarsinnaasutut naatsorsuutigineqartumik, umiarsualivillu pioreersoq sunngiffimmi umiatsianut umiarsuarnullu takornariartaatinut sillimmatigineqarsinnaalluni.
Umiarsualivinnik pingasuusunik tamanik ineriartortitsinissamut kommunip pilersaarusiorneqarnerani nunaminertanik ilanngussisoqarnikuuvoq.
Sisimiut Kangerlussuullu akornanni aqqusinikkut attaveqaat. Kalaallit Nunaanni sumiiffinni ikinnerusunituulli nunap timaanik allaanerusumik atuilluarnissamut ammaassisinnaasumik aqqusinikkut attaveqaammik angilaartumik ineriartortitsiniissamik periarfissaqarpoq, illuatungaatigullu Kangerlussuarmi mittarfiupSisimiunilu umiarsualiviup akornanni sunniuteqartussamik pilersitsisoqarsinnaalluni, taamaalillunilu attaveqarnermik ataqatigiissumik kalaallit nunaanni immikkut ataqatigiinnermik nukittuumik pilersitsisoqarsinnaalluni. Attaveqaqatigiinneq inuutissarsiutit soorlu takornariaqarnerup, aatsitassarsiornerup aamma uuliamik gassimillu misissuinerup tunisassiorsinnaanerulluunniit kiisalu sila apeqqutaavallaarunnaarnissaanut ineriartortinneqarnissaanut pingaaruteqartussaasoq.
Kommunip pilersaarusiorfigineqarnerani ingerlaarfissatut periarfissanik arlalinnik siunnersuuteqarpoq, aqqutissap pitsaanerpaap toqqarneqarnissaa siunertaralugu misissorneqartussanik, aningaasartuutissat, avatangiiisit allallu soqutiginarsinnaasut eqqarsaatigalugit nalilersorneqartussaq.
