Suliffeqarfiit sunngiffillu

Napasumi arsaattarfeqarpoq, pinnguartarfeqarluni, katersortarfeqarluni kiisalu illu sullissiveqarlunilu. Taakku saniatigut oqaluffik katersuuffiuvoq pingaaruteqartoq.

Sunngiffimmi sammisassanut nunaminertanik immikkoortitseqqinnissaq pisariaqartinneqanngitsoq nalilerneqarpoq.

Pilersaarusiorfiup ingerlanerani innuttaasut 91-iniit 65-inut ikilinissaasa nunaqarfimmi pisortanit sullissinissamut neqeroorutinut nutaanik pilersitsinissamut alliliinissanulluunniit nunaminertanik immikkoortitsisoqarnissaanut tunngavissaqanngitsoq takussutissippaat.

Massakkumulli kiffartuussinerup inissisimanerata nalilersuiffigeqqinnissaa allatullu aaqqiffigineqarsinnaanissaat pisariaqarsorinartilerpaa, tassa meeqqat atualertussat – atuartullumil.il. – ikinnerisa kinguneranik.

Meeqqerivik / meeqqat atuarfiat

Ullumikkut Napasumi meeqqat sisamat meeqqerivimmiittarput arfineq-marlullu meeqqat atuarfianni atuarlutik. Pilersaarusiornerup ingerlanerani meeqqat taakkuninnga atuisussat annertuumik ikilinissaat naatsorsuutigineqarpoq.

Inuusuttunut neqeroorutit

Aammattaaq inuusuttut amerlassusaasa annertuumik ikilinissaat naaatsorsuutigisariaqarpoq, siunissami suliffisani sulilersinnaanermut piareersarlutik inuusuttut amerlanersaat inuusuttunut ilinniarfinnut illoqarfinni annerusuniittunut aallartortarmata.

Utoqqarnut inissiat/utoqqaat angerlarsimaffiat

Nunaqarfimmi utoqqarnut inissianik sisamanik pilersitsisoqarnikuuvoq. Utoqqaat amerlassusaat taamaaginnassasoq naatsorsuutigineqarpoq, inissianillu pigineqareersunik pisariaqartitsineq matussuserneqaqqavoq.

Allat

Iliveqarfiup pioreersup allilerneqarnissaanut kommunip pilersaarusiorneqarnerani nunaminertamik immikkoortitsisoqarnikuuvoq. Pisortat kiffartuussinissamut neqeroorutaannut ilassutissanut imaluunniit annertunerulersitsinsisamut kommunip pilersaarusiorneqarnerani nunaminertamik immikkoortitsisoqanngilaq. Allannguisinnaanerit nunaminertani pioreersuni pisinnaassasut naatsorsuutigineqarpoq.