Kangaamiuni aalisakkerivimmut talittarfeqarpoq pilersuinermillu angallatinut allamik talittarfeqarluni taavalu umiatsiaaqqanut angallatinullu minnerusunut puttasoqarluni marlunnik majuartarfilinnik.
Kangaamiunut attaveqarneq umiatsianik umiarsuarnilluuniit pisarpoq. Juunimiit aggustimut A/S Arctic Umiaq Line-p sinersortaataa Sarfaq Ittuk sapaatip akunneranut marloriarluni nunaqarfimmut tikittarpoq. Taakku saniatigut aasap ingerlanerani takornariartaassuit ilaat tikittarput.
Taamaanngippat inunnik assartuussineq umiatsianik attartukkanik imaluunniit inuinnarnit pigineqartunit ingerlanneqartarpoq.
Nunaqarfik RAL-ip pilersuinermut umiarsuaanit sapaatip akunnera allortarlugu tikinneqartarpoq.
Nunaqarfimmi pisortatigoortumik qulimiguulinnut mittarfeeraqarpoq, taamaalilluni pisiariaqartitsisoqartillugu nunaqarfimmut nunaqarfimmiillu takornarissanut timmisartuussinissamut periarfissaqarluarpoq.
Aqquserngit.
Kangaamiuni aqqusineq annikitsuuvoq. Sineriaa atuarlugu aqqusineq1000 mmissaani takissusilik ingerlaarfeqarpoq. Nunaqarfiup qeqqaniit atuarfiup meeqqeriviullu inissisimaffigisanut aqqusineqarpoq. Kujammut aqqusinermik sammiveqatigiissumik peqarpoq.
Kommunip pilersaarusiorneqarnerani avannamut iliveqarfiup arsaattarfiullu tungaanut aqquserngup tallilerneqarnissaanut nunaminertamik immikkoortitsisoqassasoq siunnersuutaavoq. Inissianik amerlisaasinnaaneq aqquserngup kujammut tallilerneqarsinnaaneranik pisariaqartitsivoq.
Pisuinnarnut aqqutit
Taaneqareersutut najugaqarfinnut appakaanniarneq pisuinnaat aqqutaatigut majuartarfitsigullu annertuutigut pisarpoq. Ullumikkut arsaattarfimmut iliveqarfimmullu appakaannisaq taamaallaat qaqqaq uiarlugu tele-p napparussui saneqqullugit pisinnaavoq.
