a. Aalajangiiniarnermi tunngaviit naammassineqarsimappata, nunaminertamik atugassiineq tunniunneqassaaq
Imm.1. Piumasaqaatit atugassarititaasullu qulaatungaani taaneqartut qinnuteqartup naammassippagit, aammalu pilersaarusiornermi atuuttumi qinnuteqaat naapertuuppat, pineqartoq nunaminertamik atugassinneqarnissamik pisinnaatitaavoq.
b. § 32 malillugu inerteqquteqarneq
Imm. 2. Qinnuteqaammut taamaattumut taamaallaat kommunalbestyrelsi pinaasersinnaavoq, § 32 malillugu atuinerissamut inerteqquteqartoqarpat, malitsigisaanillu kommunalbestyrelsi pilersaarutip tunngavigisaanik allannguinissamik aallartitsilluni. Allamut tunniussinissamut qinnuteqaammi § 32 malillugu inerteqquteqartoqarsinnaanngilaq, tanna pisunik pioreersunik allannguinissamik kinguneqassanngippat. Uani inerteqqutaanngitsumik atuinermik ingerlaannarnissamik periuseq atuuppoq.
c. Piginnittut paarlaannerat – pisinermi kingornussinermi il.il.
Imm. 1. Illumik aalajangersimasumik aammalu nutaamik piginnittoq, illumik pinngitsaaliilluni tuniniakkamik kingornussunikkulluunniit tiguneqartumik, nunaminertamik tunineqarnissamik salliujuvaannarpoq. Nalornissuteqarnikkut kommuni piginnittuunermut uppernarsaammik imaluunniit piginnittuunermut tunngassutilinnik uppernarsaataasinnaasunik kommuni piumasaqarsinnaavoq.
Imm. 2. Illumik piginnittuunermik aamma/ imaluunnit atortulersuutinik il.il. tunniusssinermut atatillugu, nunaminertanik atugassiisarnermut oqartussaasut ilisimatinneqassapput. Nunaminertamik atugassiinermik atuutsilersitsinermut atatillugu kommunip erseqqissaatigissavaa, nunaminertami pineqartumik atuinermut atugassarititaasut suunerinik.
Imm. 3. Tunniussinermi atuutsilersitsinissaq kommunalbestyrelsip taamaallaat itigartitsissutigisinnaavaa, immikkoortumut pilersaarummut atuuttuusumut naapertuutinngitsumik piginnittunngortup nutaap nunaminertaq siunertanut allanut atorniarpagu.
