Attaveqaatit/ Umiarsualivik/ Mittarfik

Maniitsumi umiarsualivik pioreersoq nutaanngilisimavoq, umiarsuarnillu tikittunik kiffartuusinerminik ingerlatitsiinnassappat, iluarsartuunneqarnissaminik allilerneqarnissaminillu pisariaqartitsivoq.

Tunngavigisani pingaarnermi Alumiiniliorfiup eqqaani umiarsuarlivimmik nutaamik sanaartortoqarnissamik ilanngussaqarpoq. Alumiiniliorfik ingerlalluassappat, sanaassanik alumiiniullu aatsitsivimmit aatsitsivimmullu assartorneqassappat, taava umiarsualivik pisariaqartinneqarpoq.

Aatsitsiveqarfimmi ingerlatsinermik pisortaq suleqatigalugu, umiarsualiviup Maniitsoq illoqarfimmi nassiussassanik ingerlatsinermi atorneqarnissaa aamma naatsorsuutigineqarpoq. Periarfissaq alla tassaavoq, aatsitsiviup umiarsualivianik annikittumik alliliineq, taamaalilluni umiarsuaqarnerani utaqqisarnerit pinngitsoorneqarsinnaallutik.

Kommunip pilersaarusiorneqarnerani Aatsitsiveqarfiup umiarsualiviani, Kalaallit Nunaat tamakkerlugu nassiussassanik sullissinerup ingerlanneqartarnissaanut nunaminertamik immikkoortitsisoqarpoq, sullissivik aatsitassarsiornermut aamma kiffartuussisinnaasoq, sumiiffimmi aatsitassanik misissuinerup inernerisinnaasaa.

Alumiiniuliorfimmik suliniutip piviusunngortinneranut atatillugu, Ataa Ikerasaap nalaani umiarsualivimmik pilersitsinissaq pisariaqartinneqarpoq. Kommunip pilersaarusiorneqarnerani taamatut sanaartortoqarnissamut nunaminertamik immikkoortitsisoqarpoq, soorlu aamma inuutissarsiuutinut nunaminertanik immikkoortitsisoqarluni.

Nassiussalerineq aatsitsiveqarfimmut nuunneqarnerani, Maniitsumi angallannermut unammillernartut annikillisinneqassapput. Umiarsualivimmilu pioreersumi, sineriassorluni aalisarnermut, piniarnermut, umiatsianut angalaarutinut, takornariat umiarsuaannut sunngiffimmilu angalaartartunut il.il. pitsaanerusumik sullissisoqarsinnaalissaq.

Maniitsumi mittarfik 799 m-isut takitigivoq, tamannalu timmisartunut Dash 7-inut naammalluni. Timmisartut taamaattut pilersaarusiornerup ingerlanerani atorunnaarsikkiartornissaat naatsorsuutigineqarpoq, taamaattumik mittarfimmik alliliinissamut pisariaqartitsilernissaq naatsorsuutigineqassaaq. Mittarfimmi pioreersumi mittarfiup 1200 m-isut takitigilersillugu allilerneqarnissaanut periarfissaqarpoq.