Inuutissarsiutit suliffissallu

Qeqqata Kommuniani inuutissarsiornermut periarfissat amerlasoorpassuit suli atorluarneqan­ngitsut nalilerneqarpoq, tamaalillunilu inuutissarsiutini pioreersuni ineriartortitsinissamik piler­sitsinissamut periarfissarpassuaqarluni, kisianni inuutissarsiutini ineriartortunik taaneqartartuni periarfissat aamma atorluarneqarsinnaapput. Ineriartornissamut periarfissat nalinginnaasut al­laavigalugit uani nassuiaasoqarpoq.

Sumiiffinni amerlanerni aalisarnikkut piniarnikkullu suliffeqarnermi appariaateqartoqarpoq, ingerlaavartumik qitiusunngorsaanerup, pitsanngorsaanerup aalisariutinik aalisakkerivinnillu killilersuinerup malitsigisaanik ineriartorneq ingerlaannartussatut naatsorsuutigisariaqartoq. (Taanna aalisarnermut inatsisissamik nutaamik siunertarineqartut ilagivaat). Kommunimi aali­sakkanik tunisassianik annertunerumik pitsanngorsaasoqarsinnaavoq kiisalu tuttunik umimman­nillu suliarinnittoqarsinnaalluni. Tunisassiat pigineqareerput, piffissami matumani suliareqqii­sarneq ilaatigut Polen-imi pisarpoq, tamannalu Kalaallit Nunaanni aningaasaqarnerup imminut napatinnissaanut ineriartuutaanani.

Suliffissaqarniarnikkut periarfissat nutaat pineqartillugit annertunerusumik suliffeqarfiit ine­riartortut, takornariaqarneq, erngup nukinga atorlugu nukissat ataavartut, aatsitassarsiorneq aammalu uuliamik gassimillu suliffissuaqarneq sammineqarnerusarput. Inuussutissarsiutinut nu­taanut taakkununnga ataatsimut atuuttuusoq tassaavoq, ilinniartitaanerup pingaaruteqassusia, taamaalilluni nunarsuaq tamakkerlugu suliffeqarfiutillit piumasaqaataannut sulisussat piginnaa­sassaat naapertuunniassammata, taamaanngippat nunarsuaq tamakkerlugu sulisussarsiortaria­qartoqartassammat. Ilutigitillugu akissarsiatigut qaffasissuseq nunarsuup sinneranut unammil­lersinnaasiaqarpoq, tak. erngup nukinga atorlugu nukissiuummik sanaartornermi kineserinik akissarsiakitsunik atuinermik oqallinneq.

Ileqquusumik inuutissarsiutaasartuniit peeriartorlugu suliffeqarnerup ineriartortinneqarnerata sumut nunasisarnerup ilusaanut annertuumik sunniuteqarsinnaavoq, nunaqarfiit illoqarfiillu akornanni utertarattaarsinnaanissaq takorlooruminaammat. Inuutissarsiornissamut periarfissat nu­taat, illoqarfinnut atatillugu pilersikkiartuaartinneqartarnissaat naatsorsuutigineqarsinnaavoq. Ungasissutsit ataatsimut isigalugu annertuaallaarput isumannaatsumillu assartuisinnaaneq anni­kippallaarluni.

Kommunip pilersaarusiorneqarnerani, inuutissarsiutinik ine­riartortitsinissamik periarfissanik tamanit atorneqarsinnaasunik pilersitsoqarnissaa tamaviaarutigineqarpoq, isumal­luarnartumik kisianni aamma piviusorsiortumik tunngavilimmik, aammalu sapinngisamik inuu­tissarsiuutit ataqatigiissusaat siammasinnissaa, taamaalilluni Qeqqata Kommunia siammasissu­mik inuutissarsiornikkut tunngaveqassalluni. Soorlu assersuutigalugu, Maniitsumi aluminiumik pilersaarut suliffissuaqarnikkut tunisassiorsinnaanermut periarfissiititsinsisamut atorluarneqarsinnaa­nissaa sammineqartoq.

Nunaqarfinni inuutissarsiutitigut annertuumik ineriartortitsinissaq takornariaqarnermi, aatsitas­sarsiornermi nunaqarfinnut qanittumi aatsitassarsiorfimmik pilersitsisoqassappat, imaluunnit immikkut killilikkamik immikkut nerisassanut tunisassiornermiinnissaa naatsorsuutigineqarsin­naavoq.

Illoqarfinni nunaqarfinnilu inuutissarsiutinik suliffissaqartitsiniarnikkullu ineriartortitsinissamut periarfisanik pilersitsissagaanni, sumiiffinni ataasiakkaani pinngortitap tunniussinnaasai aam­malu ineriartornermik kivitsisinnaasut inuit piumassusillit tapersersornissaat pingaaruteqarpoq.