Ilinniarfiit allat

Sisimiuni inuusuttunut ilinniarfiit illoqarfiup qeqqani katersuuteqqapput – tullinnguuttuni ilinniarfeqarfimmik taagorneqassalluni.

Ilinniarfeqarfimmi tullinnguuttut ilinniarfigineqarsinnaapput:

  • GU
  • HTX
  • Sanaartornermik Ilinniarfik
  • Aatsitassanut Ilinniarfik, qaarusunni sulinissamik, uuliamut gas-imullu tunngatillugu ilinniarfiusoq.
  • København-imi DTU suleqatigalugu Issittumi ingeniørinngorniarfik Artek

Ilinniarfiit taakku siunissami qaninnerusumi ineriartortinneqassasut naatsorsuutigineqarpoq.

Ilinniarfeqarfiup annertusineqarnissaanut kommunip pilersaarusiorfigineqarneratigut periarfissinneqarpoq, taamaalilluni aamma siunissaq eqqarsaatigalugu ilinniarfiit ineriartortinneqarnissaannut nunaminertatigut pisariaqartitaat naammassiumallugit nunaminertanik immikkoortitsisoqarpoq.

Ilinniarfeqarfimmut atatillugu, qanitarisaaniluunniit ilinniartut inaannik sanaartorsinnaanissamut nunaminertanik immikkoortitsisoqarpoq. (takuuk najugaqarfissiat).

Pinngortitamut il.il. tunngatillugu ilisimatusarnermut atatillugu soqutigisalinnut teknologiimut tunngasunik misigassarsiortarfissaq, Amutsivikumi Inerisaavimmut inissinneqassaaq. Nunap immikkoortortaata ineriartortinneqarnissaanut pilersaarummut (NIIP) atatillugu Qeqqata Kommuniata pingaartillugu suliniutaanut ilaavoq. Taamaalilluni Danfoss Universe-mi sammineqartunut assingusunik inissiisoqarsinnaassaaq. Artek suleqatigalugu issittumi nutaaliornermik nungusaataanngitsumilli ilisimariikkanik ineriartortitsilluni periarfissanik ilisimatusartoqartarnissaa eqqarsaatigineqarpoq.