Sunngiffik

Sanaartornermut Ilinniarfiup/Aatsitassanut Ilinniarfiup eqqaani qorsooqqissortani sunngiffimmi sammisassat inissinneqassapput. Taamaalilluni immikkoortortat taakku ilinniartunut illoqarfimmiunullu pingaarnertut naapiffiusinnaassapput. Tassani inissinneqarnerisigut ilinniarfiit illoqarfimmut akuutinneqassapput.

Sunngiffimmi sammisassaqartitsiniutaareersunut tapertatut nunaminertat tullinnguuttut Kommunip pilersaarusiorfigineqarnissaatut siunnersuummi ilanngunneqarput:

  • Nalunnguarfiup kujataatungaani qaarsummi naluttarfissaq qulisaq.
  • Illup iluani sukuutsertarfissamut nunaminertaq – qaarsummi naluttarfissap qulisap eqqaani. Nukinnik atuineq eqqarsaatigalugu taakku marluk imminnut qanikkunik akikinnerussaaq, matumanimi sukuutserfimmut nillusaat naluttarfimmut kissartumik pilersuissammat.
  • Ullumikkut Nalunnguarfiup eqqaani Spejderit illuata inissisimavigisaani takornarissanut inuusuttunullu sammisassaqartitsivissamut nunaminertaq.
  • Nipilersornermik ilinniarfiup allilerneqarnissaanut, ilaatigullu nipilersornermik ilinniarfissualiorsinnaanissamut nunaminertaq.

(Nipilersornermik Ilinniarfik Nalunnguarfiup Atuarfiata eqqaanut nuunneqaruni, maannakkullu nipilersornermik ilinniarfiup toqqavia Sanaartornermik Ilinniarfimmi ilinniartunut inissianik sanaartorfigineqarluni ajunnginnerussanersoq eqqarsaatigineqartariaqarpoq).

Arsaattarfiup Nalunnguarfiullu akornanni Sanaartornermik Ilinniarfiup Aatsitassanut Ilinniarfiullu eqqaani qorsooqqinnersaq qimussinut qamuteralannullu aqqut pigiinnarneqassaaq.

Alanngorsuarmi sisorartarfimmut misigisassarsiorfimmullu atatillugu unnuisarfittalimmik pitsaasumik sisupiloortarfimmik pilersitsinissamut periarfissagissaarpoq. Tamanna illoqarfimmiunut takornarissanullu atorluarneqarsinnaasumik aasakkut ukiukkullu atorluarneqarsinnaassaaq.

Sisimiut illoqarfiani katersortarfik, timersortarfik, minihaali, Kulturikkut Illorsuaq Taseralik, qajartortartut, umiatsiaaraatileqatigiit allarpassuillu sunngiffimmi innuttaasunut neqeroorutaapput.

Kommunip pilersaarusiorfigineqarneranut nutaartatut, ilaatigut Aqqusinersuarmi, ilaatigullu Akiani najugaqarfissiap avannaatungaani qimmiliveqarfissat immikkoortinneqarput. Nunap immikkoortortai qimmilivissatut immikkoortinneqarneratigut ukioq kaajallallugu tikikkuminarneqarnissaat anguniarneqarpoq.