Inuutissarsiuteqarfik

Maniitsup allilerneqarnissaanut, suliffissaqartitsinermullu ineriartortitsinermi inuutissarsiorfinnut nunaminertanik immikkoortitsinissaq qulakkeerneqarnissaa pingaartuvoq. Eqqaavimmi nunaminertaq tamakkiisumik atorneqartutut isigineqarpoq, maannalu inuutissarsiornermut nunaminertap kujataani qaqqat ilanngunneqarnissaanut pilersaarutit piviusorsiorpalunngitsutut naliliiffigineqarlutik.

Qatserutissaasiviup maannakkut inigisaani inuutissarsiornermut nunaminertamik nutaamik immikkoortitsisoqassaaq. Qatserutissaasivillu avannarpasinnerusumut nuunneqassalluni.

Maniitsup qeqertaata avannaatungaani Alumiiniliorfiup umiarsualiviorneqarnissaanut atatsillugu, kommunip pilersaarusiorneqarnerani Alumiiniliorfimmut nunaminertamik immikkoortitsisoqassaaq. Tassani aamma containerinik kiffartuussinermut, inuutissarsiuutitigut kiffarrtuussinermik ineriartortitsinikkut, aammalu Alumiiniuliorfimmut atatillugu tunisassiornikkut allatigut ingerlatsiniermut nunaminertamik immikkoortitsisoqassalluni. Aatsitsiviullu eqqaanut inuutissarsiuteqarnikkut inissiiviugallartussamik nunaminertamik kujataata tungaanut immikkoortitsisoqassalluni.

Illoqarfimmut qanittumut inuutissarsiornermut nutaamut nunaminertanik immikkoortitsisoqassaaq, Ataa Ikerasaani umiarsualiviliornissamut naatsorsuutigineqartumut atatillugu aatsitsiveqarfimmut aqquserngup tungaanut, Kangilliillu Ataanut. Qaartiterutissaasiviup pioreersup pilersaarusiornermi nunaminertamik pisariaqartitsinermut naammanngilaq, piffissallu ilaani aqqusinniornermut, sulluliarsualiornermut aammalu illoqarfiup immikkoortortaanik nutaamik sanaartornermi nunaminertanik inuutissarsiornermut atorneqartussanik pisariaqartitsineq annertusisussaassalluni.