Inuutissarsiuteqarfik

Kangerluarsunnguami B8-mi inuutissarsiorfinnut assigiinngitsunut inissaqarfiusoq, siunissami pingaarnertut inuutissarsiorfiussaaq. Siusinnerusukkut eqqaaneqareersutut suliffeqarfiit B5-imiittut B6-imiittullu piffissap ingerlanerani inuutissarsiorfissamut nuunneqassasut naatsorsuutigineqarpoq. Illoqarfimmi inuutissarsiorfinnut sanilliullugu B8 ineriartortitsinissamut periarfissagissaarneruvoq.

Siunissami ineriartortitsinissamut periarfissagissaartitsinissaq qulakkeerniarlugu, mittarfiup avannaatungaani nutaamik umiarsualiinermut atatillugu inuutissarsiorfissamik nutaamik immikkoortitsisoqassaaq. 300 ha-tut annertutigisumik nutaamik inuutissarsiorfiliisoqarsinnaassasoq naatsorsuutigineqarpoq. Assersuussiniarluni oqaatigineqarsinnaavoq, Kangerluarsunnguami immap sinaani 10 ha-tut annertutigisumik nunaliorneq ilanngullugu, B8 36 ha-p missaani annertutigimmat.

Teknikkimut atortuutinut immikkoortortami E5-imi nutaamik ikuallaaviliortoqarsinnaanissaanut, nutaamillu asfaltiliorfiliortoqarsinnaanissaanut periarfissiisoqassaaq. Mittarfiup avannaatungaani inuutissarsiorfissami teknikkimut atortuutinut, suliffeqarfinnullu inissisimavissatigut immikkut piumasaqaataaffiusunut nunaminertanik immikkoortitsisoqarnissaa naatsorsuutigineqarpoq.

E5-imi inissap sinnera Sanaartornermik Ilinniarfimmiut Aatsitassalerinermullu Ilinniarfimmiut il.il. sungiusarfissaattut immikkoortinneqassaaq, taannalu E11-mi ersarinnerusumik allaaserineqarluni.