Nunaannaq (Det aabne land)

Illuaqqat, sunngiffimmi sammisassaqartitsiviit assigisaallu

Immikkoortup pingaarnertut atorneqarnissaa sunngiffimmi illuaqqanut aasarsiortarfinnullu immikkoortinneqarpoq. Takornarissanut illuaqqat, illuaqqat piniariartarfiit illuaqqallu oqquisarfiit killilimmik pilersinneqarsinnaapput, taakku amerlassusaasa immikkoortup pingaarnertut atorneqarneranut allannguinngippata.

Illuaqqat illuaqqamut qaninnermut minnerpaamik 60 meterimik ungasissusilerlugit sananeqassapput. Nunaqarfikuni illuaqqat akornanni ungasissuseq 30 meterinut appartinneqarsinnaavoq. Illuaqqat annerpaamik 1½-imik quleriilerlugit, tassalu qalianik atorneqartumik qalialerlugit sananeqarsinnaapput. Illuaqqanut toqqavissat toqqaviup pukkinnerpaaffianiit annerpaamik nunap qaavanut 1 meterimik portussusilerneqarsinnaapput. Illuaqqat ingerlaavartumik aserfallatsaalineqassapput, taamaalillutik pisariaqanngitsumik avatangiisinut kusanaallisaataassanatik.

Illuaqqanik pilersitsinissamut sinnerata initussusaa, immikkoortumi sanaartukkat sanaartornermi Piumasaqaatit naammassineqarsimanerat malillugu aalajangersarneqassaaq.

Aqqusinernik, angallavissanik, pisuinnarnut aqqutinik puttasunilluunniit pilersitsisoqarsinnaanngilaq. Nunaqarfikuni aqquserngit, angallaviit, pisuinnarnut aqqutit puttasullu pioreersut aserfallatsaalineqarsinnaapput annertusarneqarlutillu. Illuaqqanut atatillugu innaallagissamik, imermik kiassarnermillu pilersuinissamut, generatorinik aamma seqerngup nukinga atorlugu nukissiuutinik imaluunniit teknikkikkut atortulersuutinik allanik minnerusunik pilersitsisoqarsinnaavoq. Atortut atorneqartut eqqaamiuusunut nipiliortitsinikkut, pujuliortitsinikkut, tipiliortitsinikkut, sajutsitsinikkut allatigulluunniit pisariaqanngitsumik akornutaasut pilersinneqaqqusaanngillat.