Imermik pilersuineq Mittarfeqarfiimit (GLV) ingerlanneqarpoq, Tasersuatsiamit imermik pilersuinissamut annertuumik periarfissalimmit aallaaveqartoq, illoqarfiup annertoorujussuarmik allilerneqarneratigulluunniit tamakkiisumik atorneqarsinnaanngitsoq
Innaallagissamik pilersuineq
Innaallagissamik pilersuineq GLV-mit ingerlanneqarpoq
Kangerlussuaq sarfaliuummit diesel-itortumit pilersorneqarpoq. Amerikamiut nalaani 60Hz suli atorneqarpoq, 50Hz atorneqarani, piffiillu ilaani 110V atorneqartarluni.
Erngup nukinga atorlugu nukissiorfimmik pilersitsinissamik periarfissaqarpoq, taamaalilluni illoqarfimmut piujuaannartitsisumik innaallagissamik pilersuisoqarsimalluni, maannakkulli sanaartornissamik pilersaaruteqanngilaq.
Kuuffissuit
Kuuffissualersornerit kommunip suliassarai
Illoqarfiup kujataatungaaa avannaatungaalu kuuffissuarmut attaviligaapput, taamaalillutik illut 206-it kuuffissuarmut attaveqarlutik, illullu 36-t imikumik katersuiffimmik pilersugaallutik, taakkulu gl.lejr-imi inissisimanerusuullutik. Kuuffissuit nutarterneqarput. Kangerlussuarmi anartaajaalerinermik ingerlatsisoqanngilaq.
Kiassaateqarfiit
Kujataatungaani marlunnit kiassarnermut attaveqarpoq, taakkulu kiassaateqarfinnit uuliatortunit marlunnit kissartumik pilersorneqarlutik.
Avannaatungaani kiassarnermut attaveqarportaaq, tassani innaallagissiornermi kissamik sinneruttumit pilersorneqarluni
Eqqagassat
Eqqagassalerineq kommunip suliassaraa, taannalu GLV-imit, kommunimut sullissisutut, entreprenøri namminersortutut ingerlanneqartarluni. Eqqagassat eqqaavissuarmi aammaannartumi suliarineqartarput ikuallanneqartarlutillu. Tamanna naapertuutinngilaq, illersorsinnaasumillu ikuallaavimmik imaluunniit allamik eqqaavilerinermi illersorsinnaasumik periarfissamik qulakkeerisoqartariaqarpoq. Eqqakkanik ikuallassinnaasunik assartuinissaq siunnersuutigineqarpoq, tamannali ingerlanneqassappat umiarsuit tikittartut ukiumut marloriarnermit-pingasoriarnermit akulikinnerusariaqarpoq.
Timmisartut arlaqartut tikittartuni eqqagassanik imaarisartut aammalu aqqusaartut amerlanerat peqqutaalluni, Kangerlussuarmi innuttaasut amerlassusaannut naleqqiullugu eqqagassat amerlanerujussuupput.
Ullumikkut eqqakkanik immikkoortiterineq annikittuinnarmik ingerlanneqarpoq.
Tele
Telep napparutai nunaqarfiup tunuaniipput, mittarfeqarfimmilu radarinik ikkussuiffiit il.il. nalaani nunaminertanik immikkut aalajangersagaqarpoq.
