Imm. 1. Piffissatut killiliussap iluani atorneqarsimanngippat, aammalu nunaminertamut sanaartorsinnaanermut akuersissut atorunnaarsinneqarpat, nunaminertamik atugassiissut atorunnaarsinneqarsinnaavoq. Akuersissut aamma ilaannakortumik atorneqarsimappat, tamanna aamma atuuppoq.
Imm. 2. Akuersissutaasoq qaanngiuttoornikoq atorusukkaanni, nutaamik qinnuteqarneq pineqarpoq, taamaattorli qinnuteqaatip qaanngiutinnginnerani, sivitsorneqarnissaanik qinnuteqartoqarsinnaavoq.
Imm. 3. Sanaartornissamut nunaminertamik atugassiineq, sanaartornissamut akuersissummik pisariallit, nunaminertamik atugassiinerup kingorna kingusinnerpaamik qaammatini arfinilinni sanaartorsinnaanermut akuerineqarnissamik qinnuteqarfissalerlugu tunniunneqartarpoq.
Imm. 4. Sanaartornissanut nunamienrtanik atugassiinerit, sanaartornissamut akuersissummik pisariallit, nunaminertamik atugassiinermiit kingusinnerpaamik ukiuni marlunni atuilersinnaanermut qinnuteqarnissamut periarfissalerlugit tunniunneqartarput.
Imm. 5. Nunaminertanut sanaartornissamut akuersissummik qinnuteqarnissamik qinnuteqarfiusussaanngitsut pillugit, nunaminertamik atugassiinermiit kingusinnerpaamik ukiumi ataatsimi siunertamut qinnuteqaataasumut akuerisaasumullu nunaminertap atorneqalernissaanut piffissalerlugu tunniunneqassaaq.
Imm. 6. Immikkut pisoqartillugu, immikkoortoq 3-5-imi piffissatut killiliussat kommunalbestyrelsip sivitsorsinnaavai, nunaminertamik atugassinneqartup pilersaarutini naammassisinnaagaa nalilerneqarpat, nunaminertamillu atugassiinermi atugassarititaasutut aalajangersakkat malitsinneqarpata, sivitsuinissamik qinnuteqarfiusup piffissaa naatinnagu taanna pillugu allakkatigut tunngavilersukkamik qinnuteqartoqarpat.
Imm. 7. Aammattaaq sanaartukkanut teknikkikkullu atortulersuutinut annertunerusunut, pilersaarutip sananeqarneratalu ingerlannissaa ukiuni marlunni ingerlanneqarsinnaatinnagu, immikkoortuni 3-5-imi piffissatut aalajangersakkat kommunalbestyrelsimit sivitsorneqarsinnaapput.
a. Piffissamik qaanngiineq
Imm. 1. Inniminniinermi piffissaliussatut killiliussaq qaanngerneqarsimappat, ilisimatitsissuteqaqqaarani nunaminertamik innminniineq atorunnaarsinneqassaaq.
Imm. 2. Nunaminertami atugassiinermi piffissatut killiussaq qaanngerneqarsimappat, nunaminertamik atugassiineq atorneqarsimanngippat ilisimatitsissuteqaqqaarani atorunnaarsinneqassaaq.
Imm. 3. Nunaminertamik atugassiissummi atorneqanngitsumi piffissaliussaq qaanngerneqarsimappat, pisumik alakkarterinissamik kommunalbestyrelsi aallartitsissaaq, tak. Pilersaarusiornermi inatsimmi nr. 17, 2011, § 62, 63, 64-imi pineqaatissiissutit.
b. Uppernarsaatit piginnaasalluunniit amigartut
Imm. 1. uppernarsaatinik pisarialinnik qinnuteqartoq takkussaqartinnagu, piffissaliussap qaanngiunnerani siusinnersukkulluunniit nunaminertamik inniminniineq ilisimatitsissuteqaqqaarani atorunnaarsinneqassaaq, qinnuteqaammut piumasaqaataasut qinntueqartup naammassisinianngikkai naammassisinnaanngikkailuunniit paasinarsippat.
Imm. 2. Kommunalbestyrelsip piffissatut aalajangigaata iluani immikkoortoq 5.b-mi paasissutissat pineqarsimanngippata, kommunalbestyrelsi qinnuteqaammik itigartitsissuteqassalluni pisinnaavoq
c. Oqartussat allat akuersissutaat
Imm. 1. Nunaminertanik atugassiineq nunaminertanik atugassiisussaatitaasumut kisimik atuuttuupput. Oqartussanit allanit akuersissutit, taakkununnga ilanngullugu sanaartornissamut akuersissutit avatangiisinullu tunngatillugu akuersissutit, immikkut qinnuteqaataassapput.
Imm. 2. Nunaminertamik atugassiinermi kommunalbestyrelsip ilisimatitsissutigissavaa, sanaartornermut, atortulersuutinut il.il. atatillugu, akuersissutinik pisarialinnik pissarsiaqarnissaq, taakkununnga ilanngullugu sanaartornermut akuersissut, assaasinnaanermut akuersissut, kuuffissuup aqqutaanut pingaarnermut attavilersinnissamut akuersissutit, kiisalu innaallagissamut, imermut telemullu attavilersinnnerit.
Imm. 3. Nunaminertami atugassiinermi kommunalbestyrelsip ilisimatitsissutigissavaa, suliassatut pilersaarutaasumut avatangiisinut tunngatillugu akuersissummik aammalu uumasut nakorsaqarfianiit akuersissutinik Namminersorlutik Oqartussaniit pissarsisoqarsimanissaa naatsorsuutigineqartoq.
Imm. 4. Akuersissutinik assigisaanillu suliamut attuumassutilinnik pissarsinissaq nunaminertanillu aqutsisuusunut taakku nassiunnissaat nunaminertamik atugassinneqarsimasup nammineerluni akisussaaffigaa.
