Ataatsimut isigalugu nungusaataannginneq nukissatsinnik sipaarnissamut tunngasuuvoq, ukiunilu kingullerni tunisassiornermut, kiasarnermut assartuinermullu qanoq nukinnik atuinikinnerulernissamut tunngatillugu sammineqarnerusarpoq. Nunarsuatsinnilu ingammik nukiit ataavartut atorluarneqarnissaat aammalu nukinnik atoriikkanik atorluaasinnaaneq sammineqartorujussuuvoq.
Qeqqata Kommuniani Nukissiorfiit peqatigalugit, nukimmik atuinitsinnut takussutissamik aammalu nukissiuutinut systemit pigeriikkatta tamakkiisumik atorluarnissaanut siunnersuummik, taamaalilluni systemit imminut suleqatigiissinnaanngornissaanut sammineqarnissamik pisariaqartitsivugut. Kommuni nukinnik sipaaruteqarnissaanut pilersaaruteqaruni naleqqutissagaluarpoq.
1.1. Nungusaataanngitsumik nukimmik pilersuineq
Kalaallit Nunaanni nukissanik ataavartunik nukimmik pilersuinissamut periarfissanik atuisinnaasut amerlasuujupput. Maniitsumi alumiuniumik pilersaarutip naqissusernikuuvaa, aatsitassat assigiinngitsut assigalugit nukiit ataavartut nunarsuarmi niuernermi aamma pingaaruteqartuusoq.
Erngup nukinga maanna innaallagissamik pilersuinermi annertusaanermi anguniagaasoq, atorneqarnerani, nukimmik ataavartumik pilersuinissamut Kalaallit Nunaata periarfissai nungunngillat. Ungasinnerusoq isigalugu nukiit assigiinngitsut ataatsimoortinnerisigut nukinnik ataavartunik assigiinngiiaartunik pilersuisinnaaneq qulakkeerneqarsinnaavoq, soorlu assersuutigalugu innaallagissiuutit diesel-tortut atorunnaariartortinneqarlutik.
Nukiit aallerfiusinnaasut suli atorneqanngitsut taaneqarsinnaasut tassaapput seqerngup nukinga, ukiup ilarujussua pilerinarsiartorsinnaasutut naatsorsuutigineqarsinnaasoq, kangerlussuni inissitat sarfamik pilersuutit, sarfaqarnerpaaffiani erngup nukinganut tapiliutissatut pilerinarsinnaasoq aammalu anorip nukinga atorlugu nukissiuutinik pilersitsisinnaaneq periarfissaasinnaavoq.
1.2. Sanaartornermi aaqqiissutissat atorluarsinnaasut
Sanaartornermi aaqqissutissani atorluarneqarsinnaasunut atatillugu, pitsaanerusumik oqorsaaneq aqqutigalugu sipaarsinnaaneq aammalu nukissatigut sunniuteqarsinnaasunik aaqqiisarneq il.il. sammineqarnerusarput. Issittumi avatangiisinut pitsaasunik aaqqiissutissanik ineriartortitsilluni sulinissamut pisariaqartitsisoqartorujussuuvoq. Immikkoortumi tassani Artek ingeniøritut ilinniarfik sammisaqarpoq.
Sammineqarsinnaasoq alla tassaasinnaavoq, innaallagissamik pilersuineq nukissamik sipaarfiusinnaasoq, ullup unnuallu ingerlanerani assigiinngitsunik akeqartitsisinnaanermik periarfissaasinnaasoq, taamaalilluni ullup unnuallu ingerlanerani innaallagissamik atuinermik siammasinnerusumut tapertaasinnaasoq, aammalu atortorissaarutit innaallagissamoortut innaallagissamik atuinerannik annikillisitsilluni.
1.3. Assartuinermut aaqqissutissat atorluaanerisut.
Nunarsuup sinneranituulli immikkoortoq taanna kinguaattooqqavoq, aammalu nunani issittuni maannamuugallartoq biilinik innaallagissamoortunik suli atjornartorsiuteqarnissaq naatsorsuutaasariaqarpoq, nillernera batteriillu suli imminnut ataqatigiissinnaanngimmata. Taamaattorli illoqarfitsinni aqqusinigut ima naatsigaat, biilit innaallagissamoortut ataasiarlutik immernerminni aqquserngit marlussoriarlutik kaajallassiinnaallugit.
Taamaalilluni assartuinermut immikkoortumi aaqqiissutissanik pitsaasunik atoriaannaasoqanngilaq, kisianni nunarsuaq tamakkerlugu nukiit ataavartut assartuussinermut aaqqiissutissatut atornissaannut aaqqiissutissanik piviusorsiortunik pilersitsiniartoqarpoq, soorlu assersuutigalugu naturgas/biogas-imit aallaavilinnik, umiarsuarnut motorit innaallagissamoortut il.il..
Immikkoortumi tassani uagut samminerusassarput tassaassaaq, biilit atornissaanut sanilliulugu, pisunnissap sikkilernissarlu isumannaannerunissaa orniginarnerulernissaatalu periarfissinnissaata pilersinnissaa. Tassani peqqinnerunissaq siunertaralugu, pualavallaarnermit inuuneq naallugu nappaataalertartut Nunatsinni aamma takussaaleriartormata.
1.4. Nioqqutissanik tunisassiassanik imminut pilersorneq
Sammineqarsinnaasoq alla tassaasinnaavoq nioqqutissanik imminut pilersorneq, taamaalilluni nunanit allanit pingaarutilinnit tunisisartunut attuumavallaarunnaarluni. Soorunami Kalaallit Nunaat niueqatigiinnernit pinngitsuuissanngilaq, kisianni sumiiffinni nioqqutissasanik atuinissap aamma sumiiffinni nioqqutissanik pilersuisinnaaneq sammineqartariaqarpoq, sumiiffimmi pilersuineq qulakkeerniarlugu, kisianni sumiiffinni ineriartorneq nioqqutissanik pitsanngorsaalluni suliaqarsinnaaneq qulakkeerniarlugu. Ikuallaavinniit kissap sinneruttup naatitanik naatitsivinni tunisassiornermut atorneqarsinnaassaaq.
